أذكار المساء للأطفال مكتوبة كاملة | أذكار سهلة قبل النوم

بعد ما عرفنا الأذكار اللي وردت من القرآن، فيه كمان مجموعة من الأذكار والأدعية اللي وردت في السنة النبوية، وتقدري تعودي طفلك عليها بالتدريج حسب سنه وقدرته على الحفظ:

1- ذكر المساء.. ابدئي مع طفلك بالدعاء ده

• من الأدعية الواردة في السنة: “أَمْسَيْنَا وَأَمْسَى الْمُلْكُ لِلَّهِ، وَالْحَمْدُ لِلَّهِ، لَا إِلَهَ إِلَّا اللَّهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ، رَبِّ أَسْأَلُكَ خَيْرَ مَا فِي هَذِهِ اللَّيْلَةِ وَخَيْرَ مَا بَعْدَهَا، وَأَعُوذُ بِكَ مِنْ شَرِّ مَا فِي هَذِهِ اللَّيْلَةِ وَشَرِّ مَا بَعْدَهَا، رَبِّ أَعُوذُ بِكَ مِنَ الْكَسَلِ وَسُوءِ الْكِبَرِ، رَبِّ أَعُوذُ بِكَ مِنْ عَذَابٍ فِي النَّارِ وَعَذَابٍ فِي الْقَبْرِ” [رواه مسلم].

الذكر ده طويل شوية على الطفل الصغير، فممكن في البداية تقولي معاه أول جزء منه، وبعد كده تحفظيه باقي الدعاء بالتدريج وتفهميه اننا كده بنشكر ربنا على يومنا، وبنسأله يدينا الخير ويحفظنا من الشر.

2- دعاء شكر النعم.. علّميه يشوف الخير اللي حواليه

• ومن الأذكار اللي وردت في السنة: “اللَّهُمَّ مَا أَمْسَى بِي مِنْ نِعْمَةٍ أَوْ بِأَحَدٍ مِنْ خَلْقِكَ، فَمِنْكَ وَحْدَكَ لَا شَرِيكَ لَكَ، فَلَكَ الْحَمْدُ وَلَكَ الشُّكْرُ.”

والدعاء ده فرصة حلوة تعلمي طفلك من خلاله معنى الشكر، بدل ما تكون الأذكار مجرد كلمات بيحفظها من غير ما يفهم معناها، وممكن بعد الذكر تسأليه: “إيه أكتر نعمة فرحتك النهارده؟” عشان تربطي الذكر بحاجات هو عايشها فعلًا.

3- سيد الاستغفار.. علّمي طفلك يعني إيه أستغفر ربنا

• سيد الاستغفار من أعظم صيغ الاستغفار الواردة في السنة: “اللَّهُمَّ أَنْتَ رَبِّي لَا إِلَهَ إِلَّا أَنْتَ، خَلَقْتَنِي وَأَنَا عَبْدُكَ، وَأَنَا عَلَى عَهْدِكَ وَوَعْدِكَ مَا اسْتَطَعْتُ، أَعُوذُ بِكَ مِنْ شَرِّ مَا صَنَعْتُ، أَبُوءُ لَكَ بِنِعْمَتِكَ عَلَيَّ، وَأَبُوءُ لَكَ بِذَنْبِي، فَاغْفِرْ لِي، فَإِنَّهُ لَا يَغْفِرُ الذُّنُوبَ إِلَّا أَنْتَ.” [رواه البخاري].

وممكن يكون صعب على الطفل الصغير يحفظه كله، فابدئي معاه بالاستغفار البسيط، وبعدها عرّفيه سيد الاستغفار بالتدريج.

4- “بسم الله الذي لا يضر”.. ذكر قصير وسهل للحفظ

• من الأذكار اللي وردت في السنة: “بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيمُ.”

وبيُقال 3 مرات في الصباح والمساء، وده من الأذكار القصيرة اللي ممكن تبدأي بيها مع الطفل لأنه سهل نسبيًا في الحفظ والتكرار.

5- “رضيت بالله ربًا”.. ذكر بسيط يعلم طفلك معنى الإيمان

• من الأذكار الواردة: “رَضِيتُ بِاللَّهِ رَبًّا، وَبِالْإِسْلَامِ دِينًا، وَبِمُحَمَّدٍ ﷺ نَبِيًّا.”

وبيُقال 3 مرات في الصباح والمساء والذكر قصير، وده يخليه مناسب جدًا للأطفال اللي لسه بيبدأوا الحفظ.

6- ذكر الشهادة.. فرصة تعلمي طفلك معنى التوحيد

• ورد كذلك من أذكار المساء: “اللَّهُمَّ إِنِّي أَمْسَيْتُ أُشْهِدُكَ، وَأُشْهِدُ حَمَلَةَ عَرْشِكَ، وَمَلَائِكَتَكَ، وَجَمِيعَ خَلْقِكَ، أَنَّكَ أَنْتَ اللَّهُ لَا إِلَهَ إِلَّا أَنْتَ، وَأَنَّ مُحَمَّدًا عَبْدُكَ وَرَسُولُكَ.”

ويُروى أنه يُقال 4 مرات في المساء وده من الأذكار اللي ممكن تأجليها لمرحلة أكبر شوية لو طفلك لسه صغير، لأن الأفضل تختاري له الذكر اللي يناسب سنه وقدرته على الحفظ.

7- التسبيح.. أسهل بداية للأطفال الصغيرين

لو طفلك لسه صغير ومش قادر يحفظ الأدعية الطويلة، ابدئي معاه بأذكار قصيرة زي:

• سبحان الله

• الحمد لله

• الله أكبر

• أستغفر الله

وممكن تردديهم معاه في وقت ثابت من اليوم، من غير ما تحطي عليه عدد كبير لازم يخلصه، والأهم في البداية إن الطفل يحب الذكر ويتعود عليه، مش إنه يحفظ عدد كبير من الأذكار في وقت قصير.